Айрим мигрантлар рус тили имтиҳонидан озод қилинади

Россияга ҳукуматнинг махсус квотаси бўйича келган мигрантлар энди рус тили, тарихи ва қонунлари фанидан имтиҳон топширишлари шарт эмас. Давлат Думаси ушбу қонун лойиҳасини иккинчи ўқишда маъқуллади.

Бундай мигрантлар квота бўйича бериладиган рухсатнома асосида ишлаши мумкин, тил ва бошқа фанларни билишини тасдиқлаш талаб этилмайди. Таълим вазирлиги изоҳида бу қарор чет эллик мутахассисларни ишга олиш жараёнини осонлаштириши, иш берувчилар учун бундай ходимларни рўйхатга олиш осонроқ бўлиши айтилади.

Эслатиб ўтамиз, квота бўйича муҳожирлар РФда кўпи билан бир йил қолиши мумкин. Уларга фақат аниқ жойларда – улар юборилган объектлар ва корхоналарда ишлашга рухсат берилади. Асосан, бундай ишчилар Хитой, Ҳиндистон, Туркия ва Туркманистондан келади. Иш берувчи шартнома муддати тугаганидан кейин уларнинг кетиши учун жавобгардир.

2024 йилда Россияга квота бўйича 156 минг киши келиши мумкин эди. 2025 йилда квота деярли 235 мингга оширилди.