Аэропортда юкингиз йўқолиб қолса, нима қилиш керак?

Бўлмасин-у, мабодо шу ҳол сиз билан рўй берса, нима қилиш лозим? Қаерга мурожаат қилинади? Uzbekistan Airports бу ҳақда кўрсатма берди.

1️⃣ Ким жавобгар?

Шуни ҳам айтиш лозимки, Ўзбекистон Республикаси Ҳаво кодексининг 114-моддаси бўйича, йўловчи авиачипта сотиб олаётганда авиакомпания билан шартнома тузади. Шу сабабдан, йўловчи багажи (йўқолиши, етишмовчилиги ёки шикастланиши) учун аеропорт эмас, авиакомпания жавобгар бўлади. Шу сабабли, учиб келишда ёзилган барча ҳужжатлар авиакомпанияга юборилади.

2️⃣ Қаерга мурожаат қилинади?

Агар Ўзбекистон халқаро аэропортларидан бирига етиб келишда йўловчининг юки топилмаса, у шикастланган ёки ичидаги буюмлар йўқолган бўлса, биринчи навбатда Lost and Found (йўқолган юклар) хизматига мурожаат қилиш лозим.

3️⃣ Нималар тақдим этилади?

Бу ҳолда авиачипта ёки бортга чиқиш талони, багаж ёрлиқлари, ортиқча юк (агар мавжуд бўлса) учун тўлов амалга оширилганлигини тасдиқловчи квитанциялар тақдим қилинади.
Багаж ёрлиғи ёрдамида мазкур хизмат ходимлари сизнинг юкингиз келган-келмаганлигини аниқлашади.

4️⃣ Агар юк бошқа рейс билан кетиб қолса-чи?

Агар у жўнаш аэропортида қолган ёки бошқа рейс орқали кетган бўлса, йўловчи йўқотиш тўғрисида ариза ёзиши, керакли маълумотларни тақдим этиши ва юкнинг бошқа рейс орқали етиб келишини кутиши керак.

Агар тизим багаж белгиланган аэропортга етиб келганини кўрсатса, у ҳолда ходимлар багаж бошқа йўловчи томонидан олиб кетилганини истисно қилиш учун видеокузатув камераси тасвирларини кўриб чиқади.

5️⃣ Умуман топилмаса

Агар багаж қайтариб бўлмайдиган тарзда йўқолган бўлса, йўловчи молиявий компенсация олиш учун ариза ёзиши керак.

Йўловчи билан боғлиқ вазият (пул компенсацияси, янги чамадон ёки уни таъмирлаш) авиакомпания қоидаларига мувофиқ ҳал қилинади.